БНСУ-д анх удаа роботоор уушги шилжүүлэн суулгах хагалгааг амжилттай хийлээ
- Өндөр эрсдэлтэй уушги шилжүүлэн суулгах хагалгааг робот болон эмч нарын ур чадвараар өвчтөнд үүсэх хүндрэлийг багасгав
- Жижиг биетэй Солонгос өвчтөнд ч роботоор уушги суулгах боломжтойг батлав
Сөүлийн Үндэсний Их Сургуулийн эмнэлэг(Ерөнхий захирал Ким Ён Тэ) нь дэлхийд ховорт тооцогддог роботоор уушги шилжүүлэн суулгах хагалгааг дотооддоо анх удаа амжилттай хийж гүйцэтгэлээ. Уг хагалгаа нь дэлхийн цөөн хэдэн эмнэлэгт (NYU Langone Hospital, Cedars-Sinai Hospital, Duke University Hospital, Cleveland Clinic, Vall d'Hebron Hospital) л хийгддэг маш нарийн өндөр арга барил шаардагддаг мэс засал ба Сөүлийн Үндэсний Их Сургуулийн эмнэлэг тус хагалгааг өвчтөний биед бага зүсэлт хийдэг робот хагалгааны аргаар аюулгүй, өндөр нарийвчлалтайгаар уушги шилжүүлэн суулган хийж гүйцэтгэснээр анагаахын салбарт дэвшилтийг бүтээлээ.
Ялангуяа энэхүү мэс заслын тохиолдолын онцлог нь жижиг биетэй Солонгос хүнд роботоор уушги шилжүүлэн суулгах хагалгаа амжилттай хийгдсэн явдал юм. Ерөнхийдөө робот хагалгааг Европ хүний биед илүү тохиромжтой гэж үздэг ба учир нь жижиг цээжтэй хүмүүсийн хувьд хагалгаа хийгдэх хэсэг давчуу, роботын гарыг удирдахад хүндрэлтэй байдаг. Гэвч Сөүлийн Үндэсний Их Сургуулийн эмнэлэг “Да Винчи” робот системийг ашигласнаар энэ бэрхшээлийг даван, Солонгос хүний биеийн онцлогд ч тохиромжтой, аюулгүй, үр дүнтэй хагалгаа болохыг харууллаа.
Хагалгаанд орсон өвчтөн Юн Бён Соп(66 настай) нь уушгины фиброз буюу уушгины эд эс хатингаршиж, амьсгал авахад бэрхшээлтэй болдог архаг өвчнөөр шаналж байв. Уушгины фиброз нь эмчилгээ хийхэд амаргүй ба эм, хүчилтөрөгчийн эмчилгээ ч төдийлөн үр дүн байдаггүй. Түүний хувьд ч өвчин хурдацтай хүндрэн, уушги шилжүүлэн суулгах нь цорын ганц арга байсан юм.
Сөүлийн Үндэсний Их Сургуулийн эмнэлэгийн эмч нар өвчтөний биеийн байдлыг нягтлан хянасаны үндсэн дээр өнгөрсөн сард роботоор уушги шилжүүлэн суулгах хагалгааг амжилттай хийжээ. Уг хагалгаа нь хавирганы ясны хооронд маш жижиг зүсэлт хийн роботын гарын тусламжтайгаар гэмтсэн уушгийг авсны дараа, донор уушгийг маш нарийн ажилбараар 8цаг орчим үргэлжилсэн ба одоогийн байдлаар өвчтөн хүчилтөрөгчийн төхөөрөмжгүйгээр амьсгалж чадах хэмжээнд биеийн байдал хурдан сайжирсаар байна.
Юн Бён Соп нь “Өмнө нь амьсгалахад ч хэцүү байсан. Гэтэл одоо хүчилтөрөгчийн төхөөрөмжгүйгээр энгийн амьдралдаа орж чадсан”, “уушгиа хандивласан хүн болон хагалгаа хийсэн эмч нарт гүн талархсанаа илэрхийлье” хэмээв.
Робот хагалгаа нь уламжлалт хагалгаанаас харьцангуй зүсэлт жижигтэй, цус алдалт болон өвдөлт бага, эдгэрэх хугацаа хурдан байдаг онцлогтой. Эмч нар өндөр нарийвчлалтай 3D дүрсээр хагалгааны хэсгийг тодорхой нягтлан, робот гарын тусламжтай маш нарийн зүсэлт, оёдлыг хийдэг. Ялангуяа уушги нь зүрх, гол судас, амьсгалын замтай ойр байрладаг учраас хагалгаанд өндөр нарийвчлал шаарддаг бөгөөд робот хагалгаа энэ тал дээр аюулгүй, үр дүнтэй юм. Энэхүү хагалгаа нь Сөүлийн Үндэсний Их Сургуулийн эмнэлэгийн олон тасгийн нарийн мэргэжлийн эмч нарын хамтын ажиллагаагаар явагдсан. Зүрх судас, мэдээ алдуулалтын тасаг, мэс заслын сувилагч зэрэг олон мэргэжилтнүүд хамтран ажиллаж, хагалгааны үеэр үүсч болзошгүй янз бүрийн нөхцөл байдалд бэлэн байдаг.
Хагалгааг удирдан явуулсан Пак Сэм И На(зүрх-судас, уушги цээжний хөндийн мэс заслын тасаг) “Энэ удаагийн хагалгаа нь роботоор хийгдсэн тул эдгэрэлт хурдан, жижиг биетэй өвчтөнд ч уушги шилжүүлэн суулгах боломжтойг харуулсан чухал тохиолдол” хэмээн онцолсон.
Сөүлийн Үндэсний Их Сургуулийн эмнэлэг энэ амжилтыг түшиглэн, цаашид нарийн хүнд хагалгаанд робот хагалгааг илүү өргөнөөр нэвтрүүлэхээр төлөвлөж байна. Ингэснээр өвчтөнд аюулгүй, өндөр нарийвчлалтай эмчилгээний шинэ боломжуудыг санал болгохын зэрэгцээ, дэлхийд тэргүүлэх түвшний нарийн мэс заслын төв болох зорилт тавьж байна.